STAÐUR TIL AÐ BYGGJA SIG UPP

Hjaltastaðir eru almannaheillafélag sem vinnur að þróun öruggs og styðjandi úrræðis fyrir ungt fólk á aldrinum 18–35 ára sem er á einhverfurófi og/eða glímir við fjölþættan geðrænan vanda.

Úrræðið er ætlað þeim sem falla á milli þjónustukerfa og fá ekki nægjanlegan stuðning til að taka þátt í námi, starfi eða samfélagi. Markmiðið er að skapa nærandi umhverfi þar sem hver og einn fær tíma, rými og einstaklingsmiðaðan stuðning til að efla lífsleikni, sjálfstæði og trú á eigin getu.

​

Hjaltastaðir eiga að vera meira en tímabundið skjól. Þeir eiga að vera samfélag sem byggir á virðingu, hlýju, skilningi og samstöðu – staður þar sem fólk fær tækifæri til að finna styrkleika sína, byggja sig upp og taka skref í átt að innihaldsríku og sjálfstæðara lífi.

​

Verkefnið er unnið í minningu Hjalta Snæs Árnasonar og sprottið af þeirri sannfæringu að enginn eigi að standa einn eða falla á milli kerfa.

​

ÞRÓUN VERKEFNISINS

Hjaltastaðir eru nú í þróunarferli þar sem unnið er markvisst að því að móta framtíðarúrræðið í nánu samtali við ríki, sveitarfélög, fagfólk, notendur og aðstandendur. Markmiðið er að byggja upp sjálfbært, faglegt og raunhæft úrræði sem verði hluti af íslensku velferðarkerfi til framtíðar.

​

Við byggjum þróunarvinnuna meðal annars á hugmyndafræði Bij Bram í Hollandi, sem hefur sýnt fram á mikilvægi þess að skapa samfélag þar sem einstaklingar fá tækifæri til að lifa með reisn, tilheyra og taka virkan þátt í daglegu lífi út frá eigin styrkleikum. Jafnframt leggjum við áherslu á að þróa lausn sem tekur mið af íslenskum aðstæðum og þörfum þeirra sem hér búa.

​

Gildin okkar

Virðing · Hlýja · Samstaða · Von

​

Við trúum því að allir eigi skilið stað þar sem þeir fá að tilheyra, finna styrkleika sína og byggja sig upp á eigin forsendum.

​